A Asociación Centinelas naceu para traballar pola dignidade da muller, de toda muller calquera que sexa a súa ideoloxía, crenza ou nacionalidade. Pero dun xeito máis concreto, aquelas mulleres que son nais e que se atopan en risco de exclusión social, que é o mesmo que dicir que teñen moi difícil acceder ás posibilidades que ofrece a nosa sociedade.
Como asociación apoiamos calquera iniciativa que reivindique a igualdade entre homes e mulleres. Desexamos que a xornada do 8 de marzo serva para dar pasos efectivos neste camiño. Agardamos tamén que esta xornada non quede nun mero exercizo teórico e que serva para que se tomen medidas reais que favorezan o empoderamento das mulleres e a súa igualdade salarial e laboral.
É necesario que as institucións públicas, partidos políticos, empresas e sindicatos se comprometan a ser parte do cambio das actuais estructuras que perpetúan a desigualdade de xénero. E a nivel individual, atrevémonos a pedir que todos os que saiamos hoxe á rúa, os que sentimos a necesidade de rematar con esta inxustiza, traballemos activamente para promocionar a aquelas mulleres que teñen o camiño máis difícil, xa sexa por falta de formación, de recursos económicos ou de apoio social ou familiar.
Ogallá que esta xornada non serva para acalar conciencias senón para despertalas. Nós, pola nosa parte, seguiremos traballando e reivindicando co noso labor, a dignidade e a igualdade de todas as mulleres, sen ningún tipo de discriminación.
You must be logged in to post a comment.